MWY:
GWOBRAU RAP RADIO CYMRU 2003.

Gai Toms o'r grwp Mim Twm Llai sgoriodd yr hatrick yn noson wobrwyo RAP Radio Cymru eleni!

Profodd noson wobrwyo roc a pop Radio Cymru eleni bod y grwp Mim Twm Llai wedi hen ddod allan 'O'r Sbensh'! i fod yn un o brif grwpiau’r Sîn Roc Gymraeg!

Enwebwyd Mim Twm Llai ar gyfer albwm orau'r flwyddyn yn ogystal â'r band gorau gyda phrif leisydd y grwp Gai Toms i'w weld yng nghategori cyfansoddwr ac artist gwrywaidd y flwyddyn. Sgoriwyd hatrick ar y noson gan i'r grwp gipio'r wobr am albwm y flwyddyn ac yna Gai Toms yn derbyn y wobr am artist gwrywaidd a chyfansoddwr y flwyddyn.

Hwn yw'r trydydd tro i Gai Toms gipio'r wobr am gyfansoddwr y flwyddyn ac mae poblogrwydd albwm Mim Twm Llai ond yn profi ei dalent amlwg fel cyfansoddwr. Mae'n llwyddo i gyfansoddi a pherfformio caneuon sy'n adlewyrchu pwysigrwydd y pethe bach mewn bywyd.

Wrth wrando ar yr albwm gewch gyfle i ddod i adnabod y cyfansoddwr. Ei ganeuon serch teimladwy ar y gitâr acwstig yn cyfleu teimladau o gariad a'r caneuon sy'n nodweddiadol o'r 'crac Cymraeg' yn datgan agwedd y cyfansoddwr at gymdeithas a gwleidyddiaeth.

Er i’r grwp gael ei enwebu mewn pedwar categori mae Gai yn cyfaddef mai; "Sioc mawr oedd ennill Artist y flwyddyn gan fod MC Mabon a Aron Jones yn yr un categori, mae'r ddau artist yn dalentog iawn. Ond ro'n i'n falch iawn o ennill Cyfansoddwr y flwyddyn am y trydydd tro, Hatrick! Roedd ennill Albwm y flwyddyn yn deimlad braf nid yn unig i mi ond i'r band Elaine, Phil, Jos a Gary, a hefyd i bawb a gyfrannodd."

Felly llongyfarchiadau mawr i Mim Twm Llai ac os ydych yn awyddus i brynu'r albwm mae ar gael yn eich siop Gymraeg lleol ac ar safle we Sain (http://www.sain.wales.com)